24 мая 2019 г. — фестываль «Стратэгіі актыўнай ацэнкі для эфектыўнага навучання: лепшыя адукацыйныя практыкі»
Баннер

24 мая 2019 г. — фестываль «Стратэгіі актыўнай ацэнкі для эфектыўнага навучання: лепшыя адукацыйныя практыкі»

24 мая 2019 года  ў ДУА «Акадэмія паслядыпломнай адукацыі» прайшоў трэці фестываль «Стратэгіі актыўнай ацэнкі для эфектыўнага навучання: эфектыўныя педагагічныя стратэгіі». У гэтым годзе педагагічная супольнасць адзначыла 10 год тэхналогіі «актыўная ацэнка».

Гатоўнасць да пераменаў, мабільнасць, творчасць, адказнасць і самастойнасць у прыняцці рашэнняў - гэта характарыстыкі сучаснага педагога. Ці так легка авалодаць гэтымі якасцямі? На працягу фестываля удзельнікі шукалі адказ на ключавое пытанне: ці гатовы мы да пераменаў ва ўласнай прафесійнай дзейнасці, нават, калі прыйдзецца быць белай варонай у калектыве?

Шлях да актыўнай ацэнкі быў не такі просты. У 2009 годзе па ініцыятыве грамадскага аб’яднання  «Таварыства беларускай школы» былі праведзеныя  шэраг семінараў з удзелам польскіх экспертаў, прысвечаных новай сітэме ацэньвання, якую назвалі «актыўная ацэнка». Падчас семінараў педагогі знайшлі адказы на многія пытанні, якія іх хвалявалі: як павысіць паспяховасць вучняў, іх унутраную матывацыю, адказнасць за ўласнае навучанне? Як навучыць сама і ўзаемаацэнцы? Адна з праблем укаранення заключалася ў тым, што педагог, які пачаў змены ў планаванні і правядзенні ўрокаў быў адзін, ён, па сутнасці, быў белай варонай у калектыве.

Цяпер сітуацыя значна змянілася, многія педагогі ведаюць пра тэхналогію «актыўнай ацэнкі», ужываюць яе элементы, паспяхова абагульняюць свой вопыт.

Уяўляецца важным, што ўсе больш і больш педагогаў аддаюць перавагу актыўнай ацэнцы, разумеючы, што гэта тэхналогія з’яўляецца адказам на выклікі сучаснай адукацыі.Немалаважную ролю ў яе папулярызацыі адыграла ДУА «Акадэмія паслядыпломнай адукацыі»:

  • У 2012 годзе была распрацаваная і паспяхова рэалізуецца праграма навучальных курсаў для педагагічных работнікаў «Актыўная ацэнка як новая тэхналогия»;
  • навучанне педагогаў здзяйсняецца шляхам уключэння тэмы ў праграмы павышэння кваліфікацыі розных катэгорый педагагічных работнікаў;
  • з 2013 па 2015 гады пад кіраўніцтвам супрацоўнікаў акадэміі быў рэалізаваны інавацыйны праект «Укараненне мадэлі актыўнай ацэнкі як сродка кагнітыўнага развіцця навучэнцаў», у якім прынялі ўдзел 11 устаноў адукацыі з усёй рэспублікі;
  • выкладчыкі і метадысты акадэміі сталі аўтарамі шэрагу публікацый у СМІ, з’яўляюцца сааўтарамі кнігі «Актыўная ацэнка ў дзеянні: вопыт настаўнікаў Беларусі», якую расійскае выдавецтва «Сентябрь» пераклала на рускую мову і выдала па запыце расійскіх педагогаў.
  • шэраг педагогаў павысіла сваю кваліфікацыйную катэгорыю, удзельнічалі ў конкурсе прафесійнага майстэрства, дзякуючы актыўнай ацэнцы.
  • па запыце педагагічнай грамадскасці Расійскай Федэрацыі ў акадэміі былі праведены семінары «Актыўная ацэнка як новая тэхналогія навучання», у якіх прынялі ўдзел 92 педагога з розных рэгіёнаў Расіі: г.Петрозаводск, Рэспубліка Карэлія; г. Тула; пас. Белаярскі, пас. Старапышмінск, пас. Студэнцкі Свярдлоўскай вобласці; г. Новаўральск, г. Екацярынбург; г. Масква, ГБОУ САШ № 21 імя Э.П. Шаффе, г. Санкт-Пецярбург;
  • многія педагогі, якія пачыналі з засваення курсаў у акадэміі і дыстанцыйнага курса, сталі ментарамі і навучаюць другіх педагогаў, паказваючы лепшыя прыклады педагагічнай практыкі;
  • штогод праводзіцца фестываль па актыўнай ацэнцы.

Як прайшоў фестываль у гэтым годзе? Пра значнасць мерапрыемства для педагогаў рэспублікі сведчаць водгукі яго ўдзельнікаў, размешчаныя у сацыяльнай сетцы facebook у групе «Активная оценка».

Святлана Іванюшына , настаўнік пачатковых класаў ДУА «Сярэдняя школа № 1 Лагойска»: «Што такое Фестываль па «Актыўнай ацэнцы»? Гэта сапраўднае свята САПРАЎДНЫХ педагогаў. Тых, каму не ўсё роўна, каму ёсць, што сказаць, хто імкнецца да лепшага і вязде за сабой. Так, гэта сапраўды: збіраюцца штогод, здаецца, ўсё ўжо вывучылі і ведаюць, але радуюцца, як дзеці :) Столькі ўсмешак на задаволеных тварах педагогаў, столькі пытанняў і прапаноў, столькі цікавых ідэй не сустрэць больш нідзе.

Чаго ўсміхаюцца гэтыя настаўнікі? Радуюцца, што навучальны год скончыўся? Ці, што сёння «прагульваюць» свае ўрокі? Зусім не. Усмешкі радасці дораць сустрэчы людзей з розных куточкаў Беларусі, якія думаюць аднолькава, якім хочацца працаваць і цікава працаваць разам. Якія стаміліся ўжо ад працы ў школах і атрымліваюць падзарадку на фестывалі.

Актыўная ацэнка (АА). Я ўжо, здаецца, вывучыла яе ўздоўж і поперак, а людзі, якія там ад пачатку, увогуле ведаюць аб ёй усё. Навошта тады майстар-класы? Чаму яны навучаць? Што новага адкрыюць?

Па-першае, немагчыма ведаць усё. Па-другое, «актыўнаацэншчыкі» заўсёды знойдуць, чым «зачапіць на кручок» і як трымаць увагу. Іх майстар-класы і выступы заўсёды зрываюць апладысменты. Напрыклад, Джон Хэці. Кожны з АА-педагогаў ужо 100 разоў чуў і чытаў пра яго даследванні, выкарыстоўваў іх вынікі. Але Тамара Мацкевіч (галоўны рэдактар партала nastaunik. Info, мадэратар дыстанцыйнага курса «Актыўная ацэнка: курс-практыкум для настаўнікаў») прадэманстравала нам новыя (дагэтуль невядомыя мне асабіста) інструменты працы з даследваннем на карысць адукацыі. Цікава? Безумоўна. Спатрэбіцца? Яшчэ як. А тэма белых варон ад Алены Радзевіч і Міхася Кудзейкі? Здорава ж ўсё адлюстравалі, і адразу тэма пайшла «гуляць» па аўдыторыі, пачала «нараджаць» працяг...

А Мікалай Іванавіч са сваімі «адэптамі» і вынікамі. Ну чапляе ж, уражвае! Алена Ананчыкава І Эла Якубоўская расклалі ўсё па палічках, прапанавалі самі процьму карысных прыёмаў ды і слухачоў расшавялілі. Ала Лазіцкая наглядна прадэманстравала, чаму і калі мы не заўважаем некаторых вучняў у класе, паказала прычыны, расказала, што рабіць. Падабаецца? Безумоўна.

А Квізы Вольгі Краўчанкі! Так хутка, так цікава, так шмат, так небанальна і так захацелася адразу прымяніць!!!

Таня Багдановіч! Дэталёвы аналіз «рабочага ліста» на карысць АА! Узялі сабе ў скарбонку? Анягож! І гэта толькі тое, што мне давялося пабачыць! А колькі засталося па-за кадрамі майго зроку! І колькі тут магла б напісаць, калі б брала на мэту зрабіць дэталёвы аналіз - чаму гэта было сапраўды крута! Дзякуй арганізатарам, дзякуй аўтарам майстар-класаў і мінікурсаў! Дзякуй усім, хто далучыўся, бо без вас не было б той атмасферы! Шыкоўны дзень. Белыя вароны, яднайцеся. І тады сапраўды чорных не застанецца. Хай свята Актыўнай ацэнкі на Беларусі доўжыцца»!

Іна Плешавеня, настаўнік англійскай мовы ДУА «Сярэдняя школа № 1 г. Паставы»: «Дзякуй!!!Так прыемна было сустрэцца з аднадумцамі і сябрамі і, канешне, дадаць у сваю педагагічную капілку новых прыёмаў і ведаў».

Ларыса Валынец, намеснік дырэктара па вучэбнай дзейнасці ДУА «Сярэдняя  школа № 5 г. Смаргоні»: «Я абажаю гэтыя сустрэчы! Так здорава» !

Інна Шымко, намеснік дырэктара  ДУА «Глыбоцкая раённая гімназія»: «Было вельмi цiкава, пазiтыуна, дзякуй усiм»!

Mрына Яцкевіч, настаўнік  пачатковых класаў  ДУА «Сярэдняя школа № 69 г. Мінска»: «Дзякуй вялікі за цудоўны фестываль, крэатыўную і пазітыўную атмасферу, магчымасць паразважаць, падзяліцца думкамі, папоўніць сваю «педагагічную скарбонку» новымі цікавымі ідэямі!

Матэрыялы Фестывалю «Стратэгіі актыўнай ацэнкі для эфектыўнага навучання: лепшыя адукацыйныя практыкі» 24 мая 2019 г.

ФОТОРЕПОРТАЖ

Радзевіч А.У., начальнік цэнтра прафесійнага развіцця і інавацыйнай адукацыі

Баннер
Баннер
Баннер
Баннер
Баннер